No Surface, All Feeling

Uansett kva ein elles måtte meine om Høgre, så er partiet til å lite på. Løysingane deira er kanskje ikkje alltid dei klokaste, men dei er flinke til å forsvare dei. Og, dei toler ein trøkk. Meiner dei noko, så held dei fram med å meine det, uansett kva slags kritikk dei måtte få. Eg veit at tilnærminga mi er selektiv og kortsynt, og at eg om nokre dagar sannsynlegvis kjem til å skrive eit innlegg om at Høgre er for stae og lite audmjuke når dei møter motførestellingar, men nett ikveld passar denne innfallsvinkelen utmerka.

Høgre-leiar Erna Solberg har nemleg synt at ho er i stand til å vurdere borgarlege kollegaer etter same målestokk som ho vurderer regjeringa. Difor deler ho ut fortent kritikk til Framstegspartiet fordi deira Israel-politikk ligg hinsides den av Høgre så elska utanrikspolitiske konsensusen. "Det vil være feil å ha en utenrikspolitikk som preges av yt[t]erpunkter, og ikke av det store flertallet", refsar Erna. Og har rett.

Grunnen til at eg utan atterhald kan stille meg bak Høgre-leiaren er at ho sjølv har bidradd til å trekkje denne konsensusen nokre steg til venstre dei siste dagane. Kåre Willoch unnateke, er det jo ikkje kvardagskost at Israel-kritikken er såvidt klar frå landets konservative parti: "Israel ha[r] rett til å forsvare seg, men de driver nå en helt uforsvarlig og uproporsjonal krigføring mot Israel i Libanon". Eg trur rett nok at NRK overdriv når dei framstiller det som om at Solberg stiller FrP eit utanrikspolitisk ultimatum, men signalet er ikkje til å ta feil av. FrP kan ikkje takast alvorleg før dei anerkjenner at Israel er ei okkupasjonsmakt som må rette seg etter sentrale folkerettslege prinsipp.

Det er sjølvsagt vanskeleg å forstå, men nasjonalforsamlingas nest største parti avviser faktisk nett dette, at Israel er ei okkupasjonsmakt. FrP-leiar Siv Jensen grunngjev denne underlege historieframstillinga med at hun "synes det er viktig at noen av oss forsvarer en nasjon som veldig ofte går igjennom en ganske skarp, vridd mediesituasjon". Teknikken ho nyttar er velbrukt, men lat meg gjenta for n-te gong: Eg anerkjenner at Israel har rett til å forsvare sine innbyggjarar mot trugsmål, men FN har i fleire tiår slege fast at Israel okkuperer palestinsk land. Det må vere mogleg og lovleg for alle oss andre å ha desse to tankane i hovudet samstundes, sjølv om det utanrikspolitisk urøynde Framstegspartiet ikkje klarer det. Høgres nye signal gjer FrP enno meir isolert i debatten, samstundes som det gjer den utanrikspolitiske mellomvegen til ein meir leveleg stad å vere for mange av dei som vanlegvis kjenner ubehag ved den.

Av og til kan faktisk konservatisme og klokskap gå hand i hand.

Tips oss hvis dette innlegget er upassende

This entry was posted on august 8, 2006 at 11:23 pm and is filed under frp, høgre, israel, utanriks. You can subscribe via RSS 2.0 feed to this post's comments.